குழந்தையின் வாழ்த்து

சிகரங்களில் கூடு கட்டும்

பறவைகள் பறக்கும் உயரத்திலிருந்து

தெரியும் பூமியில்

நீர்க் கிழித்து எழுந்து மறையும்

டால்ஃபின் கண்ணில் தெரியும் ஆகாயமாய்

அர்த்தம் தெறித்து மறையும்

கவிதைகள் கண்ணாமூச்சி

துண்டு துண்டாய் வெட்டுபட்டாலும்

கவிதையில் இருக்கிறது

மண் புழுவாய் உயிர்

காட்டு நதியில்

நீர் குடிக்கும் மான்களின் மௌனம்

சலனமுறுகிறது

நிழல் இருக்கும் மரத்தின்

ஒரு முதிர்ந்த இலையுதிர்வில்

பெரும் பாலையின்

பறவைகள், மிருகங்கள்

கால் வலி கடக்கும்

மணல் சூரையின் உஷ்ணம் சொற்கள் இருந்தாலும்

ஒட்டகத்தின் வயிற்றில் எப்போதுமிருக்கும்

நீர்மை அன்பு

காகித மிருகத்தின்

கண்களில் ஒலிக்கும் பசி

கால்களுக்களிக்கும் பிடிவாத ஓட்டத்தின்

சுவடுகளின் அழுத்தம்

செலுத்திக் கொண்டிருக்கிறது

உன்னையும் உன் கவிதையையும்

இருவிரல் பற்றிக் கடித்த ஆப்பிளாய்

பூமியின் உள்ளும் புறமும்

கிளை மற்றும் வேர் விரித்து

கவிதை மனத் தாவரம்

கோபுர நிழலை

மிதிக்கத் தயங்கும்

குழந்தையின் கால்கள் வார்த்தைகளாக

வாழ்த்தித் தொடர்கிறேன்

இந்த நாளை

பிறந்த நாள் வாழ்த்துக்கள்

(உங்களைப் போல் எழுதி உங்களை வாழ்த்த விரும்பினாலும், உங்களளவுக்கு இல்லை தான். புழக்கடைச் சொற்களைப் பொறுத்துக் கொள்ளுங்கள் நண்பா.)

(திரு. நேசமித்திரன் அவர்களுக்கு.)